للكاتب عادل عبد الله
الحلقة الثالثة
فضلت افكر كتير لحد ما وصلت البيت لكن قولت بلاش تظلميه لحد ما تتأكدي يمكن تكوني فاهمة غلط !!! لازم اتأكد الأول .
طلعت البيت وحاولت اتظاهر بأني طبيعية جدا لحد لما علاء رجع البيت .
وحضرت الأكل وقعدنا ناكل انا وعلاء وقولت له علفكرة انا النهاردة اتصلت عليك كتير لكن تليفونك كان مشغول .
ايوة يا حبيبتي كنت بتكلم مع عميل للشركة بنتفاوض علي صفقة بس تصدقي يا حبيبتي كان رخم اوي وطلع عيني في التفاوض .
وبعدين يا حبيبي عملتوا ايه ؟
بردو مش اتفقنا اضطرينا نأجل الكلام لبكره .
ربنا يوفقك يا حبيبي .
كنت حافظة الباسوورد لتليفونه بدون ما يعرف استنيت لما دخل الحمام ودخلت علي الواتس والماسنجر مكانش فيهم حاجة .
دخلت علي تسجيل المكالمات لقيت مكالمات كتير لرقم مش محفوظ علي التليفون وكانت مدتهم طويلة .
لدرجة ان الموبايل كان هيقع مني .
اخدت كل المكالمات دي وحفظتها علي تليفوني علشان اسمعها في وقت تاني لما اكون لوحدي .
نزلت مني دموعي بفتكر كل اللي عملته علشانه !!!
كده خلاص ثبتت الشكوك .
لكن انا لازم افهم كل حاجة لما اسمع المكالمات هفهم كل حاجة هعرف هو دلوقتي بيفكر في ايه من ناحيتي .
حسيت ان علاء بيخرج من الحمام حطيت موبايله مكانه و مسحت دموعي بسرعة وحاولت امثل ان عندي صداع شديد علشان ادخل اقعد في اوضتي لوحدي .
دخلت اوضتي وقعدت علي سريري ومسكت تليفوني وانا بموت من القلق علشان افتحه واسمع المكالمات !!!
لكن كنت خايفة اسمع المكالمات يدخل علاء ويعرف اني كشفت . مش خايفة منه هو انا بس كنت عاوزة اعرف وافهم كل حاجة قبل ما افكر اواجهه .
حاولت انام لكن كان التفكير بيقتلني معرفتش انام لحد الصبح وقومت زي كل يوم وصحيته .
وفطرنا مع بعض ونزلت اروح شغلي .
ركبت العربية ومشيت وبدأت اشغل المكالمات واسمعها .
بعد اقل من نص دقيقة لما ركزت في الصوت دوست علي فرامل العربية باقصي قوة وانا مش مصدقة وداني و بقول يا نهار اسود يا نهار اسود . طلعت ازازة ميه كانت معايا في العربية ورشيت ميه علي وشي يمكن افوق من الحلم ده .
لكن للاسف اتأكدت انه حقيقة مش حلم .
قعدت في العربية وسمعت مكالمات تانية .
من الصدمة رميت الموبايل والسماعة في العربية ونزلت وقفلت العربية و مشيت في الشارع وانا دموعي مغرقة وشي .
كنت حاسة ان في ناس بتبصلي وانا ماشية ببكي في الشارع وناس بتسألني مالك وناس عايزة تساعدني لكن انا مش شايفة اي حد ولا سامعة اي حاجه .
مش شايفة قدامي! مش بفكر الا في ازاي انا كنت مغفلة للدرجة دي !!!!
يا تري مين فيهم اللي بدأ ؟
للدرجة دي انا ضيعت كل حياتي علشان ناس ماستحقتش ؟
ده انا ضيعت حياتي و فلوسي ومجهودي .
وبعد ساعات كتير معرفش قد ايه كانت الشمس غابت وبدأ الليل يدخل كنت حسيت بتعب رجليا و لقيت نفسي في مكان غريب .
انا حتي مش عارفة انا فين ولا سيبت العربية فين .
قولت لنفسي اني لازم اواجههم بهدوء .
اخدت تاكسي وقولتله عنوان البيت وانا في الطريق افتكرت المكان اللي سبت فيه العربية روحت مكان العربية نزلت من التاكسي وركبت عربيتي وبصيت في التليفون لقيت مكالمات فائتة كتير .
للكاتب عادل عبد الله
الحلقة الرابعة
اتصلت بيها لكن اول ما سمعت صوتها ضعفت ولساني عجز انه يتكلم !!
وصلت البيت وقعدت وقررت اني اواجه علاء اول لما يرجع .
لكن بردو بمجرد ما دخل البيت كل ما احاول اتكلم كان لساني بحس انه عاجز ومش قادرة اتكلم ولا عارفة هقوله ايه !!!
علاء اول لما شافني سألني مالك في ايه انا اول مرة اشوفك بالشكل ده !!!
مكنتش عارفة ارد ولا اتكلم الكلام في دماغي لكن كل ما احاول انطق لساني يعجز .
في الاخر كدبت و قولتله ان في حرامية حاولوا يخطفوني النهاردة بالعربية .
انزعج اوي وسألني وعملتي ايه قولتله الحمد لله ربنا ستر .
سألني اذا كنت عملت محضر في قسم الشرطة قولتله لأ لأني تعبانة من الصدمة .
قالي لازم نعمل محضر علشان المجرمين دول يتمسكوا .
قولتله فعلا لازم كل مخطئ يأخد جزاؤه .
وبعد فترة بكاء لأحلام اثناء التسجيل الصوتي لها كملت كلامها ….
انا عايزة اي حد بيسمعني يقول كان ممكن يعمل ايه لو مكاني . المهم اني مقدرتش اواجههم بالطريقة القاسية فقررت اني لازم اخد بناتي وفلوسي وابعد خالص .
تاني يوم روحت الشغل وكل اللي يشوفني يسألني مالك .
كان واضح عليا اوي ان عندي مشكلة كبيرة .
اي حد يسألني مالك كنت بقول اني تعبانة الا ماجد لما سألني طلبت منه اننا نقعد نتكلم بعد الشغل .
وفعلا بعد الشغل روحت انا وماجد وقعدنا في كافيتريا .
واول ما قالي مالك في ايه انهرت من العياط .
حاول يهديني لكن فضلت كتير اعيط كنت عايزة احكيله لأني كنت حاسه من كلام اثناء سفرنا انه انسان كويس فعلا .
